Baş redaktora “Diaspor fəaliyyətində xidmətə görə” medalı təqdim edilib

Azərbaycan Respublikası Diasporla İş üzrə Dövlət Komitəsinin sədri Fuad Muradovun Gürcüstanda fəaliyyət göstərən “Maarif” hüquqi, elmi-metodiki maarifləndirmə mərkəzi” İttifaqının sədri, “Maarif” qəzet-jurnalının baş redaktoru Ələddin Qarabağlı ilə görüşü keçirilib.

Bu barədə Dövlət Komitəsi məlumat yayıb.

Baş redaktoru salamlayan Komitə sədri Azərbaycan dövlətinin Gürcüstandakı azərbaycanlıların təhsil sahəsinə xüsusi diqqət və qayğı ilə yanaşdığını, Gürcüstanın ictimai-siyasi və humanitar sahələrinə sıx inteqrasiyası məqsədilə Azərbaycanlı kadrların hazırlığının böyük əhəmiyyət kəsb etdiyini bir daha nəzərə çatdırıb. Komitənin bu istiqamətdə həyata keçirdiyi layihələrdən bəhs edib.

Sonra Gürcüstanda fəaliyyət göstərən azərbaycandilli məktəblərdə mövcud problemlər barədə ətraflı fikir mübadiləsi aparılıb.

Baş redaktor bidirib ki, Gürcüstanın müvafiq orqanları qarşısında ali məktəbin açılması, digər universitetlərin tərkibində milli kadrları hazırlaya biləcək fakültələrin fəaliyyətinə nail olmaq kimi təşəbbüslərlə çıxış edib, Təhsil və Elm Nazirliyində Azərbaycandilli məktəblərin bir sıra problemlərinin müzakirə olunmasında iştirak edib.

Görüşün sonunda Komitə sədri baş redaktora təltif olunduğu “Diaspor fəaliyyətində xidmətə görə” medalını təqdim edib.

Ələddin Qarabağlı ona göstərilən diqqət və qayğıya görə Azərbaycan dövlətinə təşəkkürünü bildirib.