İliya Darçiaşvili iranlı həmkarı Hüseyin Əmir-Abdullahian ilə görüşüb – FOTO

Xarici işlər naziri İliya Darçiaşvili Davos Dünya İqtisadi Forumu çərçivəsində iranlı həmkarı Hüseyin Əmir-Abdullahian ilə tanışlıq görüşü keçirib.

Bu barədə məlumatı Xarici İşlər Nazirliyi yayıb.

Bildirilib ki, görüşdə Gürcüstanla İran arasında yaxşı qonşuluq münasibətləri olduğu vurğulanıb. Qeyd olunub ki, nazirlər ticari-iqtisadi münasibətlər də daxil olmaqla ikitərəfli əlaqələrə dair məsələləri, xalqlararası əlaqələrin intensivləşdirilməsinin müsbət potensialını, mədəniyyət, təhsil, turizm sahələrində əməkdaşlığı nəzərdən keçiriblər.

XİN-in məlumatına görə, söhbət zamanı regiondakı vəziyyət və çağırışlara da toxunulub. Qeyd olunub ki, görüşdə regionun dayanıqlı və stabil inkişafına diqqət çəkilib.