Bakı Limanı: Konteyner terminalının tikintisi Gürcüstan limanlarına yükdaşımaları artıracaq
Bu ilin ikinci yarısında Bakı Limanında konteyner terminalının tikintisi planlaşdırılır. Bu da Gürcüstan limanlarına yükdaşımaları artıracaq.
Bunu Bakı Beynəlxalq Dəniz Ticarət Limanının departament müdiri Xudayar Həsənli Tbilisidə keçirilən Orta Dəhlizlə bağlı regional tədbirdə deyib.
O bildirib ki, Orta Dəhlizin inkişafı üçün infrastruktur imkanları təkmilləşdirilməlidir: “İnfrastruktur potensialı imkan vermədikdə rəqəmsallaşma və təkmilləşdirmə işləri Çindən daha çox yükün cəlb edilməsinə kömək etməyəcək. Biz Bakı Dəniz Ticarət Limanı olaraq fəaliyyətimizi genişləndirəcəyik və yükdaşıma imkanlarımızı artıracağıq”.
Xatırladaq ki, bu gün Gürcüstanın paytaxtı Tbilisidə Dünya Bankının bu yaxınlarda dərc etdiyi “Orta ticarət və nəqliyyat dəhlizi: Yüklərin üç dəfə artırılması və daşınma müddətini yarıya endirmək üçün siyasətlər və investisiyalar” adlı tədqiqata həsr olunmuş regional tədbir keçirilir. Tədbirdə Gürcüstan, Azərbaycan, Qazaxıstan və Ermənistanın hökumət nümayəndələri, eləcə də dövlət müəssisələrinin, özəl sektor və beyin mərkəzlərinin təmsilçiləri iştirak edir, Dünya Bankının araşdırmalarının əsas nəticələri müzakirə edilir.